لاہور: قومی ٹی ٹوئنٹی کرکٹ ٹورنامنٹ یکم ستمبر سے شروع کروانے کی تیاریاں جاری ہیں، ملتان یا راولپنڈی ممکنہ وینیوز ہوسکتے ہیں،گولڈ ٹیمیں فائنل راؤنڈ کھیلیں گی۔
سلورز کے کوالیفائنگ راؤنڈ سے 2 سائیڈزکو پیش قدمی جاری رکھنے کا موقع ملے گا، ایونٹ بارشوں سے متاثر ہونے کے خدشات نے پی سی بی کو فکر میں مبتلا کردیا۔
تفصیلات کے مطابق کامیاب دورئہ سری لنکا کے بعد قومی کرکٹرز ان دنوں آرام کررہے ہیں، گرین
شرٹس کو 24ستمبر سے 5اکتوبر تک زمبابوے میں 3ٹی ٹوئنٹی اور اتنے ہی ون ڈے میچز کھیلنا ہیں،اکتوبر اور نومبر میں یواے ای میں انگلینڈ کیخلاف مکمل سیریز ہوگی، بعد ازاں امارات میں ہی دسمبر میں بھارت کی میزبانی کرنا ہے۔
اگر بی سی سی آئی کو حکومت کی اجازت نہ ملی تو پی سی بی پلان بی کے تحت کسی اور ٹیم کو بلائے گا، نئے سال کے آغاز میں دورئہ نیوزی لینڈ اور بعد ازاں مارچ میں بھارت میں ورلڈ ٹی ٹوئنٹی شیڈول ہے، ان حالات میں ستمبر میں ایسا قومی ٹورنامنٹ کرانے کی گنجائش موجود ہے جس میں ٹاپ کرکٹرز بھی شریک ہوسکیں، ذرائع کے مطابق بی سی بی ڈومیسٹک ٹی ٹوئنٹی کا آغاز یکم ستمبر سے کرانے پر سنجیدگی سے غور کررہا ہے۔
میزبانی کیلیے ملتان اور راولپنڈی مضبوط امیدواروں میں شامل ہیں، البتہ پنجاب بھر میں جاری بارشیں حکام کیلیے تشویش کا باعث ہیں، حتمی فیصلہ 1،2 روز میں کرلیا جائے گا، ابتدائی طور پر تیار شدہ فارمیٹ کے مطابق ایونٹ میں گولڈ ٹیمیں براہ راست فائنل راؤنڈ کھیلنے کی حقدار ہوں گی۔
سلورز کے کوالیفائنگ مقابلوں سے 2 ابتدائی سائیڈز کو پیش قدمی جاری رکھنے کا موقع ملے گا، ذرائع نے یہ بھی بتایا کہ پاکستان سپر لیگ کا فروری میں انعقاد ہوگیا تو ماضی کے برعکس اس بار قومی سپر ایٹ ٹی ٹوئنٹی ٹورنامنٹ کے انعقاد کیلیے وقت باقی بچے گا نہ اس کی ضرورت محسوس ہوگی۔
کوئی تبصرے نہیں:
ایک تبصرہ شائع کریں