ڈھاکہ ( مانیٹرنگ ڈیسک ) ایشیاء کپ کرکٹ ٹورنامنٹ میں قومی کرکٹ ٹیم کے خلاف بنگالی جادو چل گیا، انتہائی سنسنی خیز مقابلے کے بعد بنگلہ دیش نے پاکستان کو 5 وکٹوں سے تاریخی شکست د یکر فائنل کی دوڑ سے باہر کردیا اور خود فائنل میں پہنچ گیا ،سومیا سرکار کو مین آف دی میچ قرار دیا گیا ، پاکستانی بلے بازوں کی ناقص اور شرمناک بیٹنگ اور کپتان کی 19 واں اوور سمیع کودینے کی حکمت عملی لے ڈوبی، بنگلہ دیش کے ہاتھوں شکست پر شائقین سیخ پا، قومی کرکٹ ٹیم کی ناقص کارکردگی کے خلاف شدید احتجاج کیا،بنگلہ دیش فائنل میچ بھارت کے ساتھ کھیلے گا۔
میرپور کے شیر بنگلا اسٹیڈیم میں کھیلے گئے ایشیا ٹی 20 کپ کے انتہائی اہم میچ میں پاکستان نے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 129 رنز اسکور کا ہدف دیا جسے بنگلہ دیش نے 5 وکٹوں کے نقصان پر پورا کرلیا۔ تمیم اقبال اور سومیا سرکار نے اننگز کا آغاز کیا، تمیم نے پہلے ہی اوور میں محمد عامر کو چھکا رسید کرکے اپنے ارادے ظاہر کیے، لیکن دوسرے ہی اوور میں عرفان نے انہیں 7 رنز پر پویلین بھیج دیا ،جس کے بعد سومیا نے شبیر رحمان کے ساتھ ملکر 33 رنز کی شراکت قائم کی۔ شبیر 14 رنز بنا کر آؤٹ ہوئے ،جب کہ سومیا نے مشفق الرحیم کے ساتھ ملکر 37 رنز بنائے۔ سومیا 48 رنز کی اننگز کھیل کر آؤٹ ہوئے جب کہ مشفق الرحیم 12 رنز ہی بناسکے۔ شکیب الحسن کو 8 رنز پر محمد عامر نے بولڈ کیا تو انہوں نے غصے سے وکٹوں پر بلا مار دیا تاہم بعد میں انہوں نے امپائر سے معذرت بھی کی۔ بنگلہ دیش کو 2 اوورز میں 18 رنز درکار تھے، سمیع نے19ویں اوور میں 2 نوبال کرواکر نہ صرف وکٹ حاصل کرنے کا موقع گنوایا بلکہ اوور میں 15 رنز دے کر بنگلہ دیش کے لیے فتح کا راستہ ہموار کیا، محمد اللہ نے چھکا مارکر بنگلہ دیش کو فتح سے ہمکنار کروایا، وہ 24 رنز پر ناٹ آؤٹ رہے۔پاکستان کی جانب سے محمد عامر نے 2 جب کہ محمد عرفان، شعیب ملک اور شاہد آفریدی نے ایک ایک وکٹ حاصل کی۔اس سے قبل قومی ٹیم کے کپتان شاہد آفریدی نے ٹاس جیت کر پہلے بیٹنگ کا فیصلہ کیا، خرم منظور اور شرجیل خان نے اننگز کا آغاز کیا، گزشتہ میچوں کی طرح پاکستان کا ٹاپ آرڈر اس بار بھی اسکور کرنے میں ناکام رہا اور 18 رنز پر قومی ٹیم کے 3 کھلاڑی پویلین لوٹ گئے۔خرم منظور 7 گیندوں پر ایک، شرجیل خان 10، محمد حفیظ 11 گیندوں پر 2 اور عمراکمل 4 رنز بنا کر آؤٹ ہوئے۔ سرفراز احمد اور شعیب ملک نے پانچویں وکٹ کے لیے 70 رنز کی شراکت داری قائم کی۔شیعب ملک 41 رنز کی اننگز کھیل کر آؤٹ ہوئے، جس کے بعد شاہد آفریدی بیٹنگ کے لیے آئے اور اسکور بورڈ کو زحمت دیے بغیر ہی پویلین واپس لوٹ گئے۔وکٹ کیپر بیٹسمین سرفراز احمد نے شاندار بیٹنگ کا مظاہرہ کرتے ہوئے 58 رنز کی ناقابل شکست اننگز کھیلی۔بنگلہ دیش کی جانب سے عرفات سنی نے 2 ، تسکین احمد، امین حسین اور مشرفی مرتفیٰ نے ایک ایک وکٹ حاصل کی۔اس شکست کے بعد پاکستانی ٹیم ایونٹ سے باہر ہوگئی ہے جبکہ فائنل میں بھارت اور بنگلہ دیش کے درمیان مقابلہ ہوگا۔پاکستان ایشیا کپ کا آخری میچ سری لنکا کے خلاف کھیلے گا۔ حوالہ
کوئی تبصرے نہیں:
ایک تبصرہ شائع کریں