فیس بک صارفین کا وین ڈیٹا اکٹھا کرنے میں مصروف

نیو یارک : فیس بک کے بیشتر صارفین جانتے ہیں کہ سماجی رابطے کی یہ ویب سائٹ آپ کے بارے میں بہت کچھ جانتی ہے اور وہ اس معلومات کو کمپنیوں کو فراہم کرتی ہے مگر اب اس سے بھی آگے جاکر کام کرنے والی ہے۔
فیس بک اب چاہتی ہے کہ وہ آپ کے بارے میں یہ بھی جانے کہ ویب سائٹ سے ہٹ کر آپ کیا کرتے ہیں۔ فیس بک نے رواں ہفتے اعلان کیا تھا کہ وہ صارفین کے لائکس اور شیئر بٹن سمیت دیگر سوشل سرگرمیوں کا ڈیٹا اکٹھا کرنا شروع کرے گی تاکہ آپ کی نیوز فیڈ پر صارف کی پسند کے اشتہارات لگائے جا سکیں۔
یہ سلسلہ آئندہ ماہ سے شروع ہو گا اور اس کے لئے آپ کی ویب سرفنگ کی عادات، پروفائل کی تفصیلات اور آن لائن دنیا میں سرگرمیوں کی معلومات کو اشتہارات کے لیے استعمال کی جائے گی۔
فیس بک کے گلوبل ڈپٹی چیف سٹیفن ڈیڈمین نے اپنے بلاگ میں لکھا کہ ہمیں توقع ہے کہ اس سے لوگوں کو نظر آنے والے اشتہارات مزید مفید ہوں گے اور ان کو اچھا تجربہ ہوگا۔
خیال رہے کہ فیس بک نے ایک سال قبل ہی معلومات اکٹھا کرنا شروع کردی تھی اور اب وہ صارفین کی ویب سرفنگ عادات کے ڈیٹا کو واضح شکل دینے میں مصروف ہے۔
تاہم فیس بک کا کہنا ہے کہ ڈیٹا کو اکٹھا کرنا کوئی نئی بات نہیں اور اکثر بڑی ویب سائٹس اپنے وزیٹرز کی ویب عادات کی معلومات کو جمع کرتے ہیں۔
فیس بک پر اشتہارات سے بچنے کے لیے آپ سیٹنگ کے پیج پر جاکر ایڈ کے ٹیب میں اس کو روک سکتے ہیں مگر سماجی رابطے کی اس ویب سائٹ کو اپنی معلومات جمع کرنے سے روکنا بہت مشکل ہے.